Mga Ibon Sa Himpapawid

Basahin: Mateo 6:25–33 | Para mabasa ang Biblia sa loob ng isang taon: Isaias 28-29; Filipos 3

Huwag kayong mag-alala tungkol sa inyong buhay. – Mateo 6:25

Isang araw sa tag-init, habang tumataas ang sikat ng araw, nakangiting sumenyas sa akin ang isang kapitbahay at tinuro ang wind chime sa balkonahe ng bahay nila. May isang maliit na pugad ng ibon pala doon na may dalawang maliliit na ibon.

“Hinihintay nila ang nanay nila,” sabi ng kapitbahay. Pinagmasdan namin sila at itinaas ko ang aking cellphone para kumuha ng larawan. “Huwag masyadong malapit para hindi matakot ang nanay.” At dito inampon namin mula sa malayo ang isang pamilya ng ibon.

Nakakagaan ng loob ang pag-aalaga Mo, o Dios.

Pero hindi ito tumagal. Noong sumunod na linggo wala na ang mag-iina. Tahimik ring umalis tulad nang kanilang pagdating. Pero sino na ang mag-aalaga sa kanila? May sagot diyan ang Biblia: Huwag kayong mag-alala tungkol sa iyong buhay (Mateo 6:25). Isang simple pero magandang katuruan. “Masdan ninyo ang mga ibon. Hindi sila nagtatanim ni umaani man o kaya’y nagtitipon sa kamalig, ngunit pinapakain sila ng inyong Ama na nasa langit” (Tal 26 MBB).

Tulad sa maliliit na ibon, inaalagaan din tayo ng Dios – pinagyayaman Niya ang pag-iisip, katawan, kaluluwa at espiritu natin. Isang wagas na pangako. Tumuon nawa tayo sa Dios araw- araw – nang walang pagkabalisa – at lumipad nang matayog tulad ng mga ibon sa himpapawid.

Ano ang kaibahan ng pag-aalala at pagpaplano – o

pag- aalala at pagmamalasakit? Sa buhay mo,

paano tinutugunan ng Dios araw-araw ang mga pangangailangan mo?

Nakakagaan ng loob ang pag-aalaga Mo, o Dios. Tulungan Mo po akong pahalagahan ang Iyong pangako at lalo pang magtiwala sa Iyo araw-araw.

Isinulat ni Patricia Raybon