MAGBIGAY NANG MAY GALAK

Basahin: 2 CORINTO 9:6–9 | Para mabasa ang Biblia sa loob ng isang taon: EXODUS 19-20; MATEO 18:21–35

Ang bawat isa sa inyo ay magbigay nang ayon sa sariling kapasyahan…dahil mahal ng Dios ang mga nagbibigay nang may kagalakan. – 2 ᴄᴏʀɪɴᴛᴏ 9:7

Naglalakad palabas ng mall si Brenda nang may makita siyang nakatawag ng kanyang pansin. Napatigil siya sa ganda ng damit na nakasabit. Naisip ni Brenda na tiyak na magugustuhan ito ni Holly. Alam niyang gipit ang kaibigan niyang si Holly na isang single mom. Alam din ni Brenda na kailangan iyon ni Holly, pero sigurado siyang hinding-hindi gagastos si Holly para sa sarili niya. Sandaling nag-alinlangan si Brenda. Pero sa huli, ngumiti siya, kinuha ang kanyang pitaka, at binili ang damit. Ipinadala niya ito sa bahay ni Holly. Naglagay din siya ng isang kard na walang pangalan at isinulat niya ang kanyang mensahe: “Mahalaga ka at minamahal.” Masayang-masaya si Brenda habang papunta sa kanyang kotse.

Ang Dios ang perpektong halimbawa ng pagbibigay nang may kagalakan. Iniutos naman ni Apostol Pablo sa mga taga-Corinto ang tungkol sa pagiging mapagbigay. Sinabi niya, “Ang bawat isa sa inyo ay magbigay nang ayon sa sariling kapasyahan, nang walang pag-aatubili, at hindi sapilitan, dahil mahal ng Dios ang mga nagbibigay nang may kagalakan” (2 ᴄᴏʀɪɴᴛᴏ 9:7). Idinagdag pa niya, “Ang naghahasik ng masagana ay mag-aani rin ng masagana” (ᴛᴀʟ. 6).

Ang Dios ang perpektong halimbawa ng pagbibigay nang may kagalakan.

Minsan, nagbibigay tayo ng pera sa simbahan o nagbibigay ng donasyon sa isang kapaki-pakinabang na gawain. Pero may mga pagkakataon ding ginagabayan tayo ng Dios na tumugon sa pangangailangan ng isang kaibigan sa pamamagitan ng pagpapakita ng Kanyang pagmamahal—katulad ng pagbibigay ng isang bag ng grocery… o regalong damit.

Mapagmahal na Dios, ibinigay Mo po sa akin ang Iyong kaisa-isang Anak, kaya nais ko ring magbigay sa iba nang may kagalakan.

Kanino mo maipapakita ang pagmamahal ng Dios ngayong araw? Paano maaaring magdulot ng kagalakan ang pagiging bukas-palad?

Isinulat ni Elisa Morgan