TINIG NG DIOS

Basahin: Gawa 20:22–32 | Para mabasa ang Biblia sa loob ng isang taon: Josue 16-18; Lucas 2:1–24

Ipinagkakatiwala ko kayo sa Dios at sa kanyang salita na tungkol sa kanyang biyaya. Makapagpapatibay ito sa inyong pananampalataya at makapagbibigay ng lahat ng pagpapalang inilaan ng Dios para sa lahat ng taong itinuring niyang sa Kanya. – ɢᴀᴡᴀ 20:32

Matapos ang maraming taon ng pananaliksik, natutunan ng mga siyentipikong may natatanging tinig ang mga lobo. Nakakatulong ito sa kanilang pakikipag-ugnayan sa isa’t isa. Sa pag-aaral sa iba’t ibang lakas at tono ng hiyaw ng mga lobo, natutunan ng isang siyentipikong tukuyin kung sino mismo ang partikular na lobong gumagawa ng tunog.

Sa Biblia naman, maraming halimbawa ang nagpapakitang nakikilala ng Dios ang tinig ng bawat nilikha Niya. Tinawag Niya si Moises sa kanyang pangalan at nakipag-usap ang Dios sa kanya nang direkta (ᴇXᴏᴅᴜꜱ 3:4–6). Ipinahayag naman ng salmistang si David, “Tatawag ako sa Panginoon, at Siya ay sasagot sa akin” (ꜱᴀʟᴍᴏ 3:4). Binigyang-diin din ni Apostol Pablo ang kahalagahan ng pagkilala ng mga tao sa tinig ng Dios.

Mahal na Dios, tulungan Mo po akong sundin ang Iyong tinig.

Samantala, sinabihan si Apostol Pablo ng Banal na Espiritu na pumunta sa Jerusalem. Determinado si Pablo na sundin ang tinig ng Dios, kahit na hindi niya alam kung ano ang aasahan pagdating niya roon (ɢᴀᴡᴀ 20:22). Nang magpaalam na siya sa mga taga-Efeso, nagbigay-babala siya na may “mga lobo” na darating upang sirain at iligaw sila (ᴛᴀʟ. 29-30). Pagkatapos, hinikayat ni Pablo ang mga taga-Efeso na manatiling masigasig sa pagtukoy sa katotohanan ng Dios (ᴛᴀʟ. 31).

Pribilehiyo nating mga nagtitiwala kay Jesus na malamang naririnig at sinasagot tayo ng Dios. Nariyan din ang Banal na Espiritu na tumutulong sa atin upang makilala ang tinig ng Dios, at palaging nakaayon ang tinig Niya sa Kasulatan.

Mahal na Dios, tulungan Mo po akong makilala at sundin ang Iyong tinig.

Isinulat ni Xochitl Dixon